Ceremat Ngena Dilah

Setiap hari, kitai deka tetemu ka maioh orang sereta maioh bengkah leka jaku

didinga kitai. Setiap orang mansutka leka jaku ti bebida laban setiap kitai bisi

penemu enggau runding kediri empu. Ketegal penemu ti bebida, bisi ga maya kitai

enda berasai mansutka leka jaku ti enda menuku, sereta ulih ngasoh ati pangan

diri nyau enseriban.

Nama jako tangkan ba Bup Kudus ngambika kitai ulih ngena dilah enggau manah?

1 Peter 3:10-11

10Laban,“Orang ke inginka pengidup lalu ingin deka meda hari ti manah, awakka sida nagang dilah sida nyebut utai ti jai, sereta nagang mulut sida nipu orang. 11Awakka sida ngelengkaka penyai lalu ngereja pemadas. Awakka sida ngulihka pemaik lalu diau dalam pemaik.

Ari leka jaku ba 1 Peter 3:10-11 nya meransang kitai nagang dilah kitai nyebut

utai ti jai sereta nipu orang. Lengkaka pengawa ti enda manah tang kereja utai ti

badas enggau pangan diri. Arinya Tuhan deka meri pemaik enggau kitai belama-

lama ia.

Kitai mega ulih meda ba Jaku-dalam 12:22, dia madahka, TUHAN begedika orang ke bula, tang Iya gaga ati ke orang ke ngamatka semaya diri. Ba Masmur 34:11-14, Datai kitu, bala kita anak, lalu pendingka aku. Aku deka ngajar kita jalai ngemesaika TUHAN. 12Kati kita minta diri nyamai idup? Kati kita minta diri panjai umur lalu lantang diau?13Enti kita dekaka nya, anang bejaku jai lalu anang bula. 14Lengkaka penyai, lalu kereja utai ti badas. Giga pemaik enggau pengabis ati kita.

Bakani nyema kitai enda ceremat bejako ngena dilah kitai?

Kitai meda ba Jaku-dalam 11: 11-13, 11Nengeri deka tampak nama lebuh orang ke

lurus merekatka iya, tang jaku orang ke jai deka ngerusak nengeri nya.12Bejaku

mechat orang nya pengawa ti beli. Enti nuan amat pintar, nuan enda bemunyi. 13Orang ke chabul mulut enda tau dikarapka nyimpan resia, tang nuan tau ngarapka orang ke amat tau dikarapka. Ngambi reti ari Jaku-dalam 12:18, 18Leka jaku ti disebut enggau enda berunding, ngasuh ati balat telih baka pedang, tang jaku ti disebut enggau bejimat, ulih nyuman.

Nyadi menyadi, aram kitai sama berunding sebedau bejako, awakka orang ninga

jako ti ceremat ari dilah kitai berasai lantang ati. Munyi ka disebut ba atas tadi, nama kebuah kitai patut bejimat bejako, ngambika kitai enda ngerusak nama diri empu (Jaku Dalam 13:3 Bejimat nyebut utai, kena nyaga seput diri. Orang ke bejaku enggau enda berunding, ngerusak diri empu.)

Jaku Dalam 25:11-12

11Penemu ti terang disebut sebaka enggau emas ti disangkumka enggau pirak. 12 Jaku tangkan ti diberi orang ke bisi peneleba ngagai orang ke deka mending, berega agi ari tinchin emas tauka ari utai ti berega ti digaga ari emas ti pemadu tulin.

Sampi kitai:

Apai kami di Serega, Nuan penuh pengerindu enggau penyinu, kasihka kami Apai.

Ampunka dilah kami ti udah nyebut utai ti enda menuku, nadai reti, tajam sereta

enda ngelantangka ati Nuan Apai. Ajar kami ngena dilah kami enggau manah.

Awakka kami belajar ceremat bejako, dilah kami dikena nyadi berekat ngagai orang

bukai enggau kena ngangkatka pengering pengarap pangan diri dalam Nuan Siko

aja. Haleluyah. Puji meh Nuan Alllah Taala ti Besai Kuasa.

Amen.

Alice K